Appendix I. Carmina Ecclesiastica
In honorem Sancti Philippi Nerii, Patris mei.
Frequentat antra rupium
Domosque subterraneas,
Ubi prisca gens fidelium
Quievit in Deo suo,—
Ubi martyrum vis ignea
Adhuc in ossibus viget,—
Amoris inde spiritum
Philippus hausurus sibi.
Nec mortuorum supplicem
Fefellit intercessio,
Neque juvenili pectori
Non rite respondet Deus.
Nam lucido tandem globo,
Festis diebus in suis,
Clientis in sinum memor
Illabitur Paraclitus.
Et tecta dum mortalia
Vehemens subit Divinitas,
Confringit ardescens latus,
Et cordium compaginem.
Exinde, tanto debile
Jam corpus impar muneri,
Et martyr et miraculum
Amoris elanguet rogo.
Æterna laus et gloria
Patri sit atque Filio,
Et igneis Paracliti
Virtutibus per sæcula. Amen.